BAKI, AzerVoice
İranda İsrailin Xarici Kəşfiyyat Xidməti Mossad-da işləməkdə ittiham olunan şəxs edam edilib.
AzerVoice xəbər verir ki, İran mətbuatında çıxan xəbərə görə, İsmayıl Fikri adlı iranlı “Mossad-a casusluq etmək”də təqsirli bilinib.
Bildirilib ki, Mossad agentləri ilə əlaqədə olmaqda ittiham olunan Fikri 2024-cü ilin dekabrında saxlanılıb və bu gün səhər saatlarında edam edilib.
Ötən həftələrdə İranda İsrailə casusluqda ittiham olunan daha iki nəfər edam edilib.
Xatırladaq ki, 13 iyun səhər saatlarında İsrail İrana hərbi hava zərbələri endirib. Zərbələr nəticəsində çoxlu sayda hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, SEPAH-ın Hərbi Hava Qüvvələri komandanı Əmir Əli Hacızadə, 9 nüvə alimi və yüksək vəzifəli şəxslər ölüb.