BAKI, AzerVoice

Avropalılar qatara üstünlük verirlər -Təyyarə ilə səyahət azalacaq.

AzerVoice xəbər verir ki, Avropada vətəndaşlar yaxın beş il ərzində hava nəqliyyatına deyil, dəmir yolu səyahətlərinə daha çox üstünlük verməyi planlaşdırırlar.

“Hitachi Rail” şirkətinin apardığı beynəlxalq sorğuya görə, respondentlərin cəmi 2 faizi daha çox uçmağı planlaşdırdığı halda, onların yarıya yaxını qatarla daha çox səyahət etməyi düşünür.

Araşdırmaya əsasən, uzun məsafəli səyahətlərin (2,5 saat və daha çox) təxminən üçdə biri artıq dəmir yolu ilə həyata keçirilir və bu göstəricinin önümüzdəki illərdə əhəmiyyətli dərəcədə artacağı proqnozlaşdırılır. Respondentlərin 40 faizi növbəti 5 ildə, şəhər sakinlərinin isə 49 faizi bu nəqliyyat növünü daha sıx istifadə etməyi planlaşdırır.

Avropalıların üçdə ikisi, sürətli dəmir yolu alternativlərinin mövcud olduğu marşrutlarda qısa məsafəli uçuşların qadağan edilməsini dəstəkləyir. Fransada bu qayda artıq tətbiq olunur, İspaniyada isə eyni təklif gündəmdədir. Hər iki ölkədə ictimaiyyətin əhəmiyyətli hissəsi daha sərt tədbirlərin görülməsinə də hazır olduğunu bildirib.

Qeyd edək ki, sorğuya qatılanların çoxu ictimai nəqliyyatdan istifadənin artmasına dair fikir bildiriblər. Onların 70 faizi əlaqələrin yaxşılaşdırılması halında ictimai nəqliyyatdan daha çox istifadə edəcəklərini, yarıdan çoxu isə daha yüksək qiymətə baxmayaraq, bu nəqliyyat növünə üstünlük verəcəklərini vurğulayıb.

Hitachi Rail-in Qrup Bazarları Direktoru Edoardo La Ficara qeyd edib ki, “sorğu iştirakçıları növbəti illərdə dəmir yolunun ən sürətlə inkişaf edən nəqliyyat növü olacağını düşünür və bu istiqamətdə dövlət dəstəklərini də alqışlayırlar”.