BAKI,VOA,Yusif Şərifzadə
ABŞ Senatının komitəsi ölkənin keçmiş baş infeksion xəstəliklər üzrə mütəxəssisi Entoni Fauçinin COVID-19 pandemiyası ilə bağlı sualları cavablandırmaqdan imtina etməsindən sonra onun Konqresə hörmətsizlikdə ittiham olunması ilə bağlı qərarı təsdiqləyib.
VOA xəbər verir ki, Senatın Daxili Təhlükəsizlik və Hökumət İşləri Komitəsi Kentukki ştatından respublikaçı senator Rend Polun irəli sürdüyü müraciəti 8 lehinə, 7 əleyhinə səslə qəbul edib.
Qərar ötən həftə keçirilən dinləmələrdən sonra qəbul olunub. 85 yaşlı və 2022-ci ildə təqaüdə çıxmış Fauçi dinləmələr zamanı ABŞ Konstitusiyasına Beşinci Düzəlişlə təmin edilən susmaq hüququndan istifadə edərək 100 dəfədən çox sualları cavablandırmaqdan imtina edib.
Bu addım Respublikaçılar Partiyası və Donald Tramp administrasiyasının COVID-19 pandemiyası dövründə qəbul edilən qərarların yenidən araşdırılması istiqamətində həyata keçirdiyi kampaniyanın indiyədək ən ciddi mərhələsi kimi qiymətləndirilir.
Rend Pol uzun illərdir Fauçinin koronavirusun mənşəyinin gizlədilməsi ilə bağlı iddia edilən ört-basdır prosesində rol oynadığını sübut etməyə çalışır.
ABŞ-ın səhiyyə naziri Robert F. Kennedi Jr. isə pandemiya dövründə tətbiq olunan elmi yanaşmalara etimadsızlığını ifadə edərək federal səhiyyə siyasətində geniş dəyişikliklər həyata keçirir və bunu həmin dövrün siyasətinə yenidən baxılması kimi qiymətləndirir.
Hazırda komitənin qərarı tövsiyə xarakteri daşıyır və sonrakı hüquqi prosedurların necə davam edəcəyi hələlik məlum deyil.