BAKI,VOA Orxan Qədirzadə

Braziliya Prezidenti Luiz Inácio Lula da Silva ölkəsində keçiriləcək prezident seçkiləri ərəfəsində xarici müdaxilə cəhdlərinə imkan verilməyəcəyini bəyan edib. Onun açıqlaması Braziliya ilə ABŞ arasında diplomatik münasibətlərdə gərginliyin artdığı bir dövrə təsadüf edir.

Lula da Silva Braziliyanın Meteoro Brasil platformasına müsahibəsində bildirib ki, ölkəsi oktyabrın 4-də keçiriləcək seçki prosesinə hörmət göstərilməsini gözləyir.

Prezident Vaşinqtondakı Braziliya səfiri Maria Luiza Ribeiro Viotti üçün ABŞ tərəfindən vizanın ləğv edilməsinə etiraz edərək, bunu qəbuledilməz addım adlandırıb.

"Braziliyaya hörmətlə yanaşılmasını istəyirik. Ölkəmiz yalnız hazır deyil, həm də seçki prosesimizə kənardan müdaxilə etmək istəyən hər kəsə lazımi cavabı verməyə qadirdir", – deyə Lula bildirib.

Lula seçki sisteminin etibarlı olduğunu vurğulayıb

Braziliya lideri ölkənin elektron səsvermə sisteminin etibarlı və şəffaf olduğunu qeyd edib.

Onun sözlərinə görə, Braziliya uzun illərdir elektron səsvermə texnologiyasından istifadə edir və dünyada az sayda ölkə bu qədər etibarlı seçki sisteminə malik olduğunu iddia edə bilər.

Lula da Silva əlavə edib ki, oktyabr seçkilərində yenidən prezident seçilərsə, Cənubi Amerikada əvvəllər mövcud olmuş regional inteqrasiya modelinin bərpasına çalışacaq.

O, Latın Amerikası ölkələrini daha sıx əməkdaşlığa çağıraraq bildirib ki, dövlətlər birlikdə hərəkət etdikdə daha güclü regional blok formalaşdıra bilərlər.

Diplomatik böhran necə yaranıb?

ABŞ administrasiyası diplomatik viza məsələsi və səfir təyinatı ilə bağlı yaranmış fikir ayrılığı fonunda Braziliyanın Vaşinqtondakı səfiri Maria Luiza Ribeiro Viottinin vizasını ləğv edib.

ABŞ Dövlət Departamenti qərarın qarşılıqlılıq prinsipi əsasında qəbul edildiyini açıqlayıb.

Vaşinqton bildirib ki, Braziliya ötən ay iki amerikalı diplomata viza verməyib, həmçinin ABŞ Prezidenti Donald Trampın Braziliyaya səfir vəzifəsinə namizədi Danny Perez ilə bağlı təsdiq prosedurunu dayandırıb.

ABŞ ittihamları rədd edir

Braziliya hökuməti ABŞ-ın Demokratiya, İnsan Hüquqları və Əmək Bürosunun köməkçisi Riley Barnes və daha bir yüksəkvəzifəli amerikalı diplomata da ötən ay viza verməyib.

Yerli mediada həmin diplomatların Braziliyada seçki prosesi və Prezident Lula da Silva ilə bağlı tənqidi bəyanatlar verməyə hazırlaşdıqları barədə məlumatlar yayılmışdı.

ABŞ Dövlət Departamenti isə bu iddiaları təkzib edərək bildirib ki, diplomatların 27–30 iyul tarixlərində planlaşdırılan səfəri seçki prosesinin dürüstlüyü, dini azadlıqlar və ifadə azadlığı məsələləri üzrə rutin görüşlər keçirmək məqsədi daşıyırdı.

Qurum həmçinin Braziliyada seçkilərə müdaxilə və ya demokratik prosesləri pozmaq niyyətində olduqları barədə iddiaların əsassız olduğunu vurğulayıb.