BAKI,VOA,Yusif Şərifzadə
Sinqapurun Dənizçilik və Liman İdarəsi Hörmüz boğazında Sinqapur bayrağı altında üzən Ever Lovely gəmisinə naməlum mərminin düşməsi ilə bağlı bəyanat yayıb.
VOA xəbər verir ki, qurum hadisə nəticəsində gəminin Hörmüz boğazından təhlükəsiz şəkildə keçərək marşrutu üzrə hərəkətini davam etdirdiyini bildirib.
Açıqlamada qeyd olunub ki, gəminin 21 nəfərdən ibarət ekipajının bütün üzvləri sağ-salamatdır.
Sinqapurun Dənizçilik və Liman İdarəsi insidenti səbəbsiz və heç bir əsaslandırması olmayan hücum kimi qiymətləndirərək bunun beynəlxalq hüququn pozulması olduğunu vurğulayıb.
Qurum bildirib ki, beynəlxalq gəmiçiliyə təsir göstərən bütün hərəkətlər beynəlxalq hüquqa, xüsusilə də Birləşmiş Millətlər Təşkilatının Dəniz Hüququ Konvensiyasına tam uyğun olmalı, dənizçilərin və gəmilərin təhlükəsizliyini risk altına atmamalıdır.