BAKI,VOA, Fərid Mikayılov

Almaniya Silahlı Qüvvələri NATO-nun şərq cinahını gücləndirmək strategiyası çərçivəsində Belarus sərhədinə yaxın ərazilərə hərbi qüvvə yerləşdirməyə başlayıb.

VOA xəbər verir ki, rəsmi Berlin Litvada, birbaşa Belarus sərhədinin yaxınlığında ümumilikdə 5 minə yaxın əsgərdən ibarət briqada formalaşdırır.

Hazırda Litva ərazisində 1,8 min alman hərbçisinin dislokasiya olunduğu və onların sərhəd zonasında aktiv hərbi təlimlər keçirdiyi bildirilir.

Almaniya quru qoşunlarının müfəttişi, general-leytenant Kristian Froydinqin sözlərinə görə, əsas hədəf gələn il — 2027-ci ilə qədər Litvadakı bu hərbi briqadanın tam döyüş hazırlığını təmin etməkdir.

Planlaşdırılan hərbi strategiyaya əsasən, 2027-ci ilin sonuna kimi iki alman batalyonu daimi əsaslarla bölgədə yerləşdiriləcək.

Bundesver rəsmiləri briqadanın tam komplektləşdirilməsi üçün zərurət yaranacağı təqdirdə əsgərlərin məcburi qaydada xidmətə cəlb olunma ehtimalını da istisna etmirlər. NATO-nun bu addımlarına reaksiya verən Rusiya Xarici İşlər nazirinin müavini Aleksandr Qruşko isə bəyan edib ki, alyans ölkələri Moskva ilə real hərbi toqquşmaya hazırlaşır və Qərbin əsas məqsədi Rusiyanı strateji məğlubiyyətə uğratmaqdır.