BAKI,VOA, Fərid Mikayılov

Fransa hökuməti Qəzzaya yardım aparmağa çalışan fəal flotiliyada iştirak edən Fransa vətəndaşlarına qarşı rəftarla bağlı prokurorluğa müraciət edib.

VOA xəbər verir ki, bunu Fransanın xarici işlər naziri Jan-Noel Barro açıqlayıb.

Nazirin sözlərinə görə, Türkiyədə fəaliyyət göstərən Fransa baş konsulunun hazırladığı hesabat əsasında fəallara qarşı seksual zorakılıq, soyuğa məruz qoyulma, döyülmə və təhqiredici rəftar halları barədə məlumatlar əldə olunub.

“Bütün bu əməllər cinayət tərkibli ola bilər. Buna görə də məsələ ilə bağlı prokurorluğa müraciət etmək qərarına gəldim”, - deyə Barro bildirib.

Qeyd olunub ki, ötən həftə Qəzzaya humanitar yardım çatdırmağa çalışan fəal flotiliya saxlanılıb. Təşkilatçıların iddiasına görə, saxlanılan fəallar fiziki və psixoloji zorakılığa məruz qalıb, bir neçə nəfər xəsarətlərlə xəstəxanaya yerləşdirilib.

Məlumata əsasən, ən azı 15 nəfər seksual zorakılıq, o cümlədən zorlanma halları barədə şikayət edib. Daha sonra fəallar sərbəst buraxılıb.

Fransalı fəalların vəkilləri də müstəqil şəkildə şikayət verəcəklərini açıqlayıblar. Onlar müştərilərinə qarşı alçaldıcı rəftar, işgəncə və zorakılıq tətbiq edildiyini iddia edirlər.