BAKI,VOA, Fərid Mikayılov
İsveçdə keçirilən NATO xarici işlər nazirlərinin iki günlük toplantısı başa çatıb. Görüşlər zamanı iyul ayında Ankarada keçiriləcək NATO Sammiti öncəsi alyansın əsas təhlükəsizlik prioritetləri müəyyənləşdirilib.
VOA xəbər verir ki, toplantıda əsas müzakirə mövzuları müdafiə sənayesi imkanlarının genişləndirilməsi və NATO üzvlərinin müdafiə xərclərinin ümumi daxili məhsulun 5 faizi səviyyəsinə çatdırılması olsa da, Hörmüz boğazındakı vəziyyət də gündəmdə xüsusi yer tutub.
NATO-nun baş katibi Mark Rutte çıxışında İranın Hörmüz boğazını bağlamaqla qlobal iqtisadiyyata təzyiq göstərməyə çalışdığını bildirib. O qeyd edib ki, bölgədə tranzitin açıq saxlanılması üçün ölkələrin birgə fəaliyyət göstərməsi vacibdir.
Toplantı zamanı İran ətrafında yaranmış vəziyyətin ABŞ və bəzi Avropa müttəfiqləri arasında siyasi fikir ayrılıqlarını da üzə çıxardığı bildirilib.
ABŞ dövlət katibi Marko Rubio isə NATO üzvlərinin İranın nüvə silahına sahib olmaması məsələsində ortaq mövqedə olduğunu, lakin Vaşinqtonun çağırışlarına bütün ölkələrin eyni səviyyədə dəstək vermədiyini bildirib.
Rubio həmçinin İspaniyanın İranla bağlı əməliyyatlar üçün ABŞ qüvvələrinə ölkədəki hərbi bazalardan istifadə icazəsi verməməsini tənqid edib.