BAKI,VOA Orxan Qədirzadə

ABŞ prezidenti Donald Tramp sosial media platformasında ardıcıl paylaşdığı çoxsaylı mesajlarla yenidən diqqət mərkəzinə düşüb.

VOA xəbər verir ki, Tramp üç saat ərzində 50-dən çox paylaşım edərək siyasi rəqiblərini hədəf alan videolar, süni intellekt vasitəsilə hazırlanmış satirik görüntülər və müxtəlif iddialar yayıb.

Paylaşımlar Trampın 79 yaşında olması fonunda onun fiziki və psixi sağlamlığı ilə bağlı ictimai müzakirələrin artdığı dövrə təsadüf edib.

Məlumata görə, Tramp paylaşım etdiyi bəzi materiallarda ABŞ-nin keçmiş prezidenti Barak Obamaı sərt şəkildə tənqid edib. Yenidən paylaşdığı bəzi mesajlarda Obama haqqında “xain” və “şər qüvvə” kimi ifadələr yer alıb. Digər paylaşımlarda isə Trampın siyasi tənqidçilərinə qarşı hüquqi addımlar atılması çağırışları səsləndirilib.

Paylaşımlarda həmçinin 2020-ci il ABŞ prezident seçkiləri ilə bağlı əvvəllər də irəli sürdüyü saxtakarlıq iddiaları yenidən gündəmə gətirilib. Tramp seçki maşınları vasitəsilə səslərin dəyişdirildiyini iddia edən materialları da paylaşaraq seçkilərin ondan “oğurlandığını” təkrar vurğulayıb.

ABŞ Federal Təhqiqat Bürosunun keçmiş direktoru Ceyms Komi isə yerli mediaya açıqlamasında Trampın son davranışlarının narahatlıq doğurduğunu bildirib.

Komi televiziya müsahibəsində “Onun vəziyyəti yaxşı görünmür. Bu siyasi hücum kimi səslənə bilər, amma məncə, o, müəyyən problemlər yaşayır” deyib. O, Trampın gecə saatlarında etdiyi paylaşımları “obsessiv və qəribə davranış” kimi xarakterizə edib.

Eyni zamanda yayılan sorğu nəticələrinə görə, respondentlərin 59 faizi Trampın ölkəni idarə etmək üçün kifayət qədər zehni qabiliyyətə malik olmadığını düşünür. Sorğuda iştirak edənlərin 55 faizi isə onun fiziki baxımdan da vəzifəyə uyğun olmadığını bildirib.

Bununla yanaşı, Ağ Ev prezidentin səhhətinin yaxşı olduğunu açıqlayıb və Trampın mayın 26-da Vaşinqton yaxınlığındakı Valter Rid Hərbi Tibb Mərkəzində tibbi müayinədən keçəcəyini bildirib.