BAKI,VOA, Fərid Mikayılov

ABŞ və İran arasında gərginliyin artdığı, eyni zamanda Hörmüz Boğazı ətrafında qarşıdurmaların davam etdiyi bir dövrdə Vaşinqton Tehranın atəşkəs təklifinə verəcəyi cavabı gözləyir.

VOA xəbər verir ki, Marko Rubio bildirib ki, ABŞ Yaxın Şərqdəki münaqişələrin yumşaldılması məqsədilə irəli sürülən müvəqqəti atəşkəs planına İranın bu gün cavab verməsini gözləyir.

Onun sözlərinə görə, Pakistanın vasitəçiliyi ilə Tehran-a təqdim edilən memorandum daha geniş və davamlı sülh danışıqlarına yol aça bilər.

İtaliyanın paytaxtı Romada açıqlama verən Rubio, İranın ciddi və konstruktiv təkliflə prosesə yanaşacağına ümid etdiyini bildirib.

Diplomatik cəhdlərlə paralel olaraq Hörmüz Boğazında vəziyyət daha da gərginləşib. ABŞ ordusu İran bayrağı altında olan və liman blokadasını pozmağa cəhd etdiyi iddia edilən iki tankerin zərərsizləşdirildiyini açıqlayıb. İran tərəfi isə ABŞ-ni atəşkəsi pozmaqda ittiham edib.

Abbas Əraqçi Vaşinqtonun diplomatik proseslə paralel olaraq hərbi addımlar atdığını iddia edərək İranın müdafiə imkanlarını, xüsusilə raket potensialını gücləndirdiyini bildirib.

Donald Tramp isə Ağ Evdə jurnalistlərə açıqlamasında İranla bağlı yaxın zamanda məktub gözlədiyini deyib. O, bölgədəki hərbi aktivliyi “məhdud toqquşmalar” kimi qiymətləndirərək, razılaşma əldə olunmazsa İranın ciddi hərbi və iqtisadi nəticələrlə üzləşəcəyini vurğulayıb.

ABŞ Maliyyə Nazirliyi İranın hərbi fəaliyyətlərinə dəstək verdiyi iddia edilən Çin və Honq Konq mərkəzli şirkətlərə qarşı yeni sanksiyalar tətbiq edib.