BAKI,VOA, Fərid Mikayılov

Böyük Britaniya kral ailəsinin ABŞ-a səfəri beynəlxalq diqqət mərkəzindədir.

VOA xəbər verir ki, III Çarlz və kraliça Kamilla ABŞ-a dörd günlük rəsmi səfərə başlayıblar.

Səfər çərçivəsində kral ailəsi Ağ Evdə ABŞ prezidenti Donald Tramp və birinci xanım Melaniya Tramp tərəfindən qəbul olunub.

Bildirilib ki, bu səfər III Çarlzın monarx kimi ABŞ-a ilk səfəri olmaqla yanaşı, 2007-ci ildən sonra Britaniya monarxının ölkəyə ilk rəsmi səfəri kimi qiymətləndirilir. Səfərin ABŞ-ın müstəqilliyinin 250 illiyi ilə üst-üstə düşməsi onun əhəmiyyətini daha da artırır.

Proqrama əsasən, aprelin 28-də Ağ Evin Cənub meydanında rəsmi qarşılama mərasimi keçiriləcək, daha sonra Oval kabinetdə ikitərəfli görüş baş tutacaq. Eyni zamanda, kraliça Kamilla ABŞ-da tələbələrlə görüş keçirəcək.

Səfərin növbəti mərhələsində kral ailəsi Nyu-York şəhərinə yollanacaq. Aprelin 30-da isə onlar Arlinqton Milli Qəbiristanlığı ziyarət edəcək.

Qeyd olunur ki, səfərin sonunda III Çarlz Bermuda adaları istiqamətində səfərini davam etdirəcək ki, bu da həmin əraziyə ilk kral səfəri olacaq.