BAKI,VOA, Orxan Qədirzadə

ABŞ rəsmiləri iranlı general Qasım Süleymaninin iki yaxın qohumunu saxlayıb, onların daimi yaşayış icazələri ləğv edilib.

VOA xəbər verir ki, şənbə günü ABŞ Dövlət Departamenti federal zabitlərin iranlı mərhum hərbi komandan Qasım Süleymaninin iki qohumunu həbs etdiyini açıqlayıb. Bu addım Dövlət katibi Marko Rubionun həmin şəxslərin qanuni daimi yaşayış statusunu (qrin-kart) ləğv etməsindən sonra atılıb.

Məlumata görə, Həmidə Süleymani Əfşar və qızı hazırda ABŞ-ın İmmiqrasiya və Gömrük Mühafizəsi Agentliyinin (ICE) nəzarətindədir. Həmidənin həyat yoldaşının isə ABŞ-a girişi qadağan edilib. Dövlət Departamentinin bəyanatında bildirilir ki, Həmidə Süleymani Əfşar ABŞ-da yaşadığı müddət ərzində İran rejiminin təbliğatı ilə məşğul olub, Yaxın Şərqdəki Amerika hərbi obyektlərinə hücumları dəstəkləyib və İranın yeni ali rəhbəri Müctəba Xameneini mədh edib.

Bəyanatda həmçinin qeyd olunub ki, Donald Tramp administrasiyası ABŞ-ın Amerikanın əleyhinə olan "terrorçu" rejimləri dəstəkləyən xarici vətəndaşlar üçün sığınacaq yerinə çevrilməsinə icazə verməyəcək. Xatırladaq ki, Qasım Süleymani 2020-ci ilin əvvəlində Bağdad hava limanı yaxınlığında ABŞ-ın hava zərbəsi nəticəsində öldürülüb. Hazırda regionda gərginlik davam edir və tərəflər arasında qarşılıqlı hərbi zərbələr qeydə alınır.