BAKI,VOA, Fərid Mikayılov

ABŞ prezidenti Donald Tramp İranla bağlı gərginlik fonunda müttəfiqlərə sərt mesaj ünvanlayıb.

VOA xəbər verir ki, Tramp sosial media platformasında paylaşdığı açıqlamada bildirib ki, ABŞ-ın İrana qarşı zərbələrinə qoşulmayan və hazırda aviasiya yanacağına ehtiyac duyan ölkələr ya Amerika neftini almalı, ya da Hörmüz boğazına gedərək onu “özləri götürməlidir”.

O qeyd edib ki, Vaşinqton bu ölkələrə artıq dəstək verməyəcək. Bu bəyanat ABŞ-ın müttəfiqləri ilə enerji və təhlükəsizlik sahəsində münasibətlərində yeni gərginlik yarada biləcək mesaj kimi qiymətləndirilir.

Məlumata görə, bəzi Avropa İttifaqı ölkələri Yaxın Şərqə hərbi gəmilər göndərsə də, ümumilikdə Avropa rəsmiləri regionda gərginliyin azaldılması və diplomatik həll yollarının tapılması çağırışlarını davam etdirir.

Analitiklər bildirir ki, İranla bağlı münaqişə fonunda Avropa üçün ən həssas enerji məhsullarından biri məhz aviasiya yanacağı hesab olunur və mövcud vəziyyət bu sahədə ciddi risklər yaradır.

Ekspertlərə görə, Trampın bu açıqlaması qlobal enerji bazarlarında və transatlantik münasibətlərdə əlavə qeyri-müəyyənlik yarada bilər.