BAKI, AzerVoice, Orxan Qədirzadə
ABŞ Prezidenti Donald Trampın əmri ilə dünyanın ən böyük aviadaşıyıcısı olan "USS Gerald R. Ford" Karib dənizindən Yaxın Şərqə doğru yola düşüb. Bu addım Vaşinqtonun Tehrana nüvə proqramı ilə bağlı təzyiqləri artırdığı bir vaxtda atılıb.
AzerVoice xəbər verir ki, "The New York Times" və "Associated Press"in mənbələrinə istinadən verdiyi məlumata görə, bu yerdəyişmə regionda ABŞ-ın eyni anda iki aviadaşıyıcı qrupuna sahib olmasını təmin edəcək.
Hazırda regionda olan "USS Abraham Lincoln" aviadaşıyıcısına "USS Gerald R. Ford"un da qoşulması Trampın "maksimum təzyiq" siyasətinin hərbi hissəsini təşkil edir. Prezident Tramp dünən verdiyi açıqlamada İranı xəbərdar edərək bildirib ki, sazişin əldə olunmaması Tehran üçün "çox travmatik" olacaq.
Ağ Evdə İsrailin baş naziri Benyamin Netanyahu ilə keçirilən uzunmüddətli müzakirələrdən sonra bu qərarın verilməsi diqqət çəkir. Netanyahu Vaşinqtonu İranın ballistik raket proqramını məhdudlaşdırmağa və "HƏMAS" ilə "Hizbullah"-a dəstəyi dayandırmağa məcbur etməyə çağırıb.
"USS Gerald R. Ford daha öncə oktyabr 2025-də Aralıq dənizindən Karib dənizinə Nikolas Maduronun ələ keçirilməsi ilə nəticələnən əməliyyatda iştirak etmək üçün göndərilmişdi.
İndi isə Yaxın Şərqə, İran sahillərinə yönləndirildi.
Gəmi heyəti artıq 8 aydır fasiləsiz xidmətdədir və bu yerdəyişmə ABŞ hərbi tarixindəki ən uzunmüddətli ezamiyyətlərdən biri hesab olunur.