BAKI,AzerVoice, Fərid Mikayılov
Venesuela Prezidenti Nikolas Maduro ABŞ administrasiyasının təzyiqləri və hərbi əməliyyatları davam etdirdiyi bir vaxtda Karakasın narkotik qaçaqmalçılığı ilə mübarizə məsələsində Vaşinqtonla konstruktiv dialoqa hazır olduğunu bəyan edib.
AzerVoice xəbər verir ki, Maduro, ABŞ ilə bu sahədə razılaşma üzrə danışıqlara açıq olduqlarını bildirib, lakin ötən həftə Mərkəzi Kəşfiyyat İdarəsinin (CIA) Venesueladakı bir limana təşkil etdiyi iddia edilən pilotsuz uçuş aparatı hücumu ilə bağlı şərh verməkdən imtina edib.
Maduro Vaşinqtonun ötən ilin avqust ayından etibarən Karib dənizində genişmiqyaslı hərbi mövcudluq yaratmaqla Venesuelada hakimiyyət dəyişikliyinə nail olmağa və ölkənin zəngin neft ehtiyatlarına çıxış əldə etməyə çalışdığını bir daha vurğulayıb.
“Onlar nə istəyir? Təhdid, təzyiq və güc yolu ilə özlərini qəbul etdirməyə çalışdıqları açıqdır. Artıq hər iki tərəfin faktlara əsaslanaraq ciddi şəkildə danışmağa başlamasının vaxtı çatıb” – deyə Maduro bildirib.
O qeyd edib ki, əgər ABŞ narkotik qaçaqmalçılığı ilə mübarizə mövzusunda real və səmimi danışıqlara hazırdırsa, Venesuela da bu prosesə açıqdır.
Maduro əlavə edib ki, Vaşinqtonun marağı neftdirsə, Karakas ABŞ investisiyalarına açıqdır:
“Əgər neft istəyirlərsə, Venesuela Chevron nümunəsində olduğu kimi ABŞ sərmayələri üçün açıqdır. Nə vaxt istəsələr, harada istəsələr və necə istəsələr”.
Qeyd edək ki, Chevron hazırda Venesuela xam neftini ABŞ-yə ixrac edən yeganə iri Amerika şirkətidir. Venesuela dünyada təsdiqlənmiş ən böyük neft ehtiyatlarına malik ölkə hesab olunur.
Müsahibə ABŞ ordusunun yeni il gecəsi narkotik qaçaqmalçılığı ilə əlaqələndirilən beş qayığa hücum etdiyini elan etdiyi gün qeydə alınıb. Tramp administrasiyasının açıqladığı rəqəmlərə görə, son əməliyyatlarla birlikdə hücuma məruz qalan qayıqların sayı 35-ə, həlak olanların sayı isə azı 115 nəfərə çatıb. Ölənlər arasında Venesuela vətəndaşlarının da olduğu bildirilir.
ABŞ Prezidenti Donald Tramp bu hücumları ABŞ-yə narkotik axınının qarşısını almaq üçün zəruri addım kimi əsaslandıraraq, Vaşinqtonun narkotik kartelləri ilə “silahlı qarşıdurma”ya girdiyini iddia edib.
Hücumlar əvvəlcə Venesuelanın Karib sahillərində başlayıb, daha sonra Şərqi Sakit okeana qədər genişlənib. Bundan əlavə, ötən həftə ABŞ-ın Venesuela narkotik kartelləri tərəfindən istifadə edildiyini düşündüyü bir limana edilən PUA hücumunun arxasında CIA-nin dayandığı iddia olunub.
Venesuela Prezidenti ölkə ərazisində aparılan əməliyyatla bağlı suallara cavab verməkdən imtina etsə də, bir neçə gün ərzində mövzuya münasibət bildirə biləcəyini qeyd edib.