BAKI,AzerVoice,Fərid Mikayılov

Venesuela Prezidenti Nikolas Maduro bildirib ki, ABŞ ictimaiyyəti ölkəsinə qarşı mümkün hərbi qarşıdurmaya imkan verməyəcək.

AzerVoice xəbər verir ki, Maduronun sözlərinə görə, ABŞ xalqı sülh tərəfdarıdır və Venesuelaya qarşı müharibə ssenarilərini dəstəkləmir.

Maduro, ABŞ-nin Karib hövzəsindəki hərbi fəallığına, eləcə də Çilidə keçirilmiş prezident seçkilərinin nəticələrinə toxunub. O iddia edib ki, ABŞ-də bəzi dairələr Venesuelaya qarşı “məntiqsiz və təhlükəli müharibə” başlatmaq niyyətindədir.

“ABŞ ictimaiyyətinin bu cür ssenarilərə razılıq verəcəyinə inanmıram. ABŞ xalqı Cənubi Amerikada neft naminə müharibə aparmaq istəyən müharibə təhrikçilərinin qarşısını alacaq”- deyə Maduro vurğulayıb.

Çıxışının bir hissəsində ingilis dilində danışan Venesuela lideri birbaşa ABŞ xalqına müraciət edib. O, nifrət və imperialist ambisiyalar üzərində qurulan yanaşmaların dayandırılmalı olduğunu bildirib.

Onun sözlərinə görə, ABŞ-də fəaliyyət göstərən işçi hərəkatları, dini icmalar və müxtəlif siyasi çevrələr sülhün dəyərini anlayır və Venesuelaya hörmətin vacibliyini qəbul edirlər.

Maduro, ABŞ-nin Venesuelaya məxsus neft tankerini müsadirə etməsinə etiraz olaraq ölkə daxilində keçirilən aksiyalara da toxunub. O, bu qərara qarşı etiraz edən və yürüşlərə qatılan Venesuela vətəndaşlarına təşəkkür edib.

Venesuela Prezidenti Çilidə keçirilən prezident seçkilərində qalib gəlmiş ifrat sağçı namizəd Xose Antonio Kastın Venesueladan olan miqrantlarla bağlı bəyanatlarını da sərt tənqid edib. Maduro Çilidə yaşayan venesuelalılara ölkələrinə qayıtmaq çağırışı edib.

Qeyd edək ki, Çilidə prezident seçkilərinin ikinci turunda Xose Antonio Kast 16 faiz fərqlə qalib gəlib.