BAKI,AzerVoice,Fərid Mikayılov

ABŞ Prezidenti Donald Tramp Venesuelaya qarşı narkotiklərlə mübarizə çərçivəsində həyata keçirilən əməliyyatların yaxın vaxtlarda qurudan müdaxilələrlə də genişlənəcəyini bəyan edib.

AzerVoice xəbər verir ki, Ağ Evdə keçirdiyi mətbuat konfransından sonra jurnalistlərin suallarını cavablandıran Tramp administrasiyasının Venesuela üzərində təzyiqi artırdığını vurğulayıb.

Onun sözlərinə görə, prezidentliyi dövründə Venesueladan ABŞ-a daxil olan narkotik axınında 91 faiz azalma qeydə alınıb və bu, tətbiq etdiyi sərt siyasətin nəticəsidir.

Prezident “Maduro ABŞ-ın təzyiqlərinə cavab veribmi?” sualına belə cavab verib:

“Bu artıq sadəcə təzyiq deyil. Maduro ilə qısa bir görüşüm oldu, ona müəyyən mesajlar verdim. Nəticəsini görəcəyik. Venesuela bizə narkotik göndərir, həmçinin göndərməməli olduğu şəxsləri də ölkəmizə yönləndirir”- deyə o bildirib.

ABŞ Prezidenti son günlər ictimai müzakirələrə səbəb olan, yaralı iki şəxsin ikinci hücum nəticəsində öldürülməsi məsələsinə də münasibət bildirib. Onun sözlərinə görə, həmin şəxslərin öldürülməsini dəstəkləmir, lakin narkotik daşıyan qayıqlara qarşı zərbələrin davam etdirilməsinin tərəfdarıdır.

“O qayıqları idarə edən şəxslər ölkəmizdə insanları öldürməyə çalışan cinayətkarlardır”- deyə ABŞ lideri vurğulayıb.