BAKI, AzerVoice, Nailə Babazadə
Birləşmiş Millətlər Təşkilatının Livan Sülh Qüvvələri (UNIFIL) İsrailin UNIFIL patruluna PUA (pilotsuz uçuş aparatı) və tankla hücum etdiyini açıqlayıb.
AzerVoice xəbər verir ki, İsrail, Birləşmiş Millətlər Təşkilatının Livan Sülh Qüvvələrini (UNIFIL) hədəfə alıb. UNIFIL-in yaydığı açıqlamada bildirilib ki, Livanın cənubundakı Kfar Kila yaxınlığında patrul xidməti aparan UNIFIL qüvvələrinin yaxınlığına İsrail ordusuna məxsus bir pilotsuz uçuş aparatı tərəfindən qumbara atılıb və bir neçə dəqiqə sonra İsrail tankı patrul qrupunun yerləşdiyi bölgəyə atəş açıb.
Açıqlamada hücum nəticəsində ölən və ya yaralanan olmadığı qeyd olunub və “İsrail Müdafiə Qüvvələrinin (IDF) bu addımları BMT Təhlükəsizlik Şurasının 1701 saylı qətnaməsini və Livanın suverenliyini pozur, Livanın cənubunda Təhlükəsizlik Şurası tərəfindən vəzifələndirilmiş sülhməramlı qüvvələrin təhlükəsizliyini və toxunulmazlığını görməməzliyə vurur” – deyə vurğulanıb.