BAKI, AzerVoice, Fərid Mikayılov

İranın xarici işlər naziri Abbas Əraqçi ilə Avropa İttifaqının xarici siyasət üzrə ali nümayəndəsi Kaya Kallas Dohada görüş keçirib.

AzerVoice xəbər verir ki, tərəflər Tehranla bağlı nüvə məsələsində son inkişafları müzakirə ediblər.

Danışıqlar zamanı əsas diqqət üç Avropa ölkəsinin (Böyük Britaniya, Fransa və Almaniya) əvvəlki BMT Təhlükəsizlik Şurası qətnamələrini yenidən tətbiq etmək qərarına yönəlib.

Əraqçi bu addımı “qanunsuz və əsassız” adlandıraraq, Avropa İttifaqı rəsmisinə JCPOA-nın (Birgə Hərtərəfli Fəaliyyət Planı) Birgə Komissiyasının koordinatoru kimi məsuliyyətini xatırladıb. O, qeyd edib ki, Aİ bu mandat çərçivəsində diplomatiyaya qarşı atılan addımları neytrallaşdırmalıdır.

İranlı nazir ölkəsinin diplomatiya yoluna sadiq qaldığını vurğulayaraq, Tehranın bu istiqamətdə qətiyyətini və ciddi mövqeyini davam etdirdiyini bildirib.

Öz növbəsində, Kaya Kallas narahatlıqların aradan qaldırılması üçün yeganə yolun diplomatiya və danışıqlar olduğunu bildirib. O, bütün tərəflərə daha çox diplomatik imkan yaradılmasının vacibliyini qeyd edib.