BAKI, AzerVoice, Səməd Əyyubov
Böyük Britaniyanın Baş naziri Kir Starmer bildirib ki, ölkədə sığınacaq axtaran qeyri-qanuni miqrantların yerləşdirildiyi otellərin bağlanması prosesi daha tez reallaşdırılacaq.
AzerVoice xəbər verir ki, Starmer sığınmacıların yerləşdirildiyi otellərin sistemli şəkildə boşaldılmasının vacibliyini vurğulayıb.
Baş nazir qeyri-qanuni miqrasiya ilə mübarizədə qətiyyətli olduğunu bildirib: “İnsanların bu məsələ ilə bağlı niyə narahat olduqlarını tamamilə başa düşürəm.”
Otellərin nə vaxt bağlanacağına dair suala cavabında Starmer xatırladıb ki, hökumət hazırda istifadə olunan 200-ə yaxın otelin 2029-cu ilə qədər bağlanmasını planlaşdırır. O əlavə edib ki, bu prosesi daha tez başa çatdırmaq niyyətindədir.
“Bu prosesi irəli çəkmək istəyirəm. Bunun yaxşı bir çağırış olduğunu düşünürəm” - deyə, Baş nazir qeyd edib.
O bildirib ki, otellərin boşaldılmasının yeganə yolu sığınacaq müraciətlərinin daha sürətli və sistemli şəkildə araşdırılması, burada qalmaq hüququ olmayan şəxslərin isə geri göndərilməsidir.
“Sığınmacıların qaldığı bütün otellərin bağlandığını görmək istəyirəm” - deyə, Starmer vurğulayıb.
Qeyd edək ki, Böyük Britaniyada sığınmacıların otellərdə yerləşdirilməsinə qarşı ictimai narazılıq artır. Ali Məhkəmə Eppinq bölgəsində bir oteldə yaşayan sığınmacıların sentyabrın 12-nə qədər çıxarılması barədə qərar qəbul edib. Bu qərar ölkədə yeni hüquqi addımlar üçün presedent yaradıb. Ardınca ifrat sağçı “Reform UK” Partiyasına bağlı 12 bələdiyyə üzvü də oxşar addımlar atacaqlarını açıqlayıb.
Müxalifətdəki Mühafizəkar Partiyanın Broksborn Bələdiyyə Şurası da analoji iddia qaldırmaq üçün təcili hüquqi rəy tələb edib. Son aylarda Eppinq bölgəsində sığınmacılara qarşı keçirilən etirazlar bəzən zorakılıqla nəticələnib. Bu aksiyalarda 16 nəfər saxlanılıb.
İyulun 30-da Londonda, Uest Drayton ərazisində keçirilən nümayişdə etirazçılar qeyri-qanuni miqrantların saxlandığı üç otelə girməyə cəhd ediblər, beş nəfər həbs olunub. Dünən isə ifrat sağçı bir qrup “Isle of Dogs” bölgəsində etiraz keçirib, maskalı şəxslər polisə hücum edib. Təxminən 100 nəfərlik aksiyada dörd nümayişçi saxlanılıb.