BAKI, AzerVoice, Nərmin Ağayeva

Putin sülh sammitinə qatılarsa, toxunulmazlıq veriləcək.

AzerVoice xəbər verir ki, İsveçrə hökuməti Rusiya prezidenti Vladimir Putin və Ukrayna prezidenti Vladimir Zelenski arasında keçiriləcək mümkün sülh sammitinə ev sahibliyi etməyə hazır olduğunu açıqlayıb. Xarici işlər naziri İqnazio Kassis bildirib ki, əgər Putin iştirak edərsə, ona rəsmi konfrans çərçivəsində toxunulmazlıq təmin ediləcək.

Kassis vurğulayıb ki, İsveçrə Beynəlxalq Cinayət Məhkəməsinin (BCM) yurisdiksiyasına daxil olsa da, ölkə beynəlxalq hüquqa uyğun olaraq rəsmi sammitlərdə iştirak edən liderlər üçün xüsusi müdafiə mexanizmi tətbiq edir. O əlavə edib ki, bu toxunulmazlıq şəxsi səfərlər üçün deyil, yalnız rəsmi sülh danışıqları kontekstində qüvvədə olacaq.

Qeyd edək ki, 2023-cü ildə BCM Putin və Rusiyanın Uşaq Hüquqları üzrə müvəkkili Mariya Lvova-Belovanın həbsinə order vermişdi. Onlar ukraynalı uşaqların işğal olunmuş ərazilərdən Rusiyaya qanunsuz aparılmasında ittiham olunurdular. Moskva isə bu qərarı hüquqi cəhətdən etibarsız sayaraq iddiaları rədd etmişdi.

Xatırladaq ki, Fransa prezidenti Emmanuel Makron İsveçrənin Cenevrə şəhərinin neytral məkan kimi sammit üçün əlverişli ola biləcəyini irəli sürüb. O, “Mən neytral ölkə tapmağa çalışıram, ola bilsin ki, İsveçrə, Cenevrə və ya başqa bir ölkə” deyə açıqlama vermişdi.