BAKI, AzerVoice, Nərmin Ağayeva

Argentinadakı insan haqları təşkilatları Baş nazir Benyamin Netanyahunun ölkəyə səfəri öncəsi ona qarşı cinayət işi qaldırıb.

AzerVoice xəbər verir ki, Argentina mediasının məlumatına görə, Plaza de Mayo Təsis Xəttinin Anaları, Sülh və Ədalət Xidməti (Serpaj), Siyasi olaraq itkin düşənlərin və məhbusların ailələri və Argentina İnsan Haqları Liqası Netanyahunu “soyqırım, insanlığa qarşı cinayətlər və müharibə cinayətləri” törətməkdə ittiham edərək məhkəməyə müraciət edib.

Şikayətdə İsrail hökumətinin Fələstin xalqına qarşı “sistematik qırğın siyasəti” yürüdərək onların yaşamaq, insan ləyaqəti və öz müqəddəratını təyinetmə hüququnu pozduğu bildirilib. Mətndə, Qəzzada on minlərlə insanın həlak olduğu, milyonlarla insanın didərgin düşdüyü, humanitar yardımların isə əngəlləndiyi vurğulanıb.

Məlumata görə, cinayət şikayəti Nobel Sülh Mükafatı laureatı Adolfo Perez Esquivel də daxil olmaqla bir çox insan haqları təşkilatının nümayəndələri tərəfindən dəstəklənib. Bundan əlavə, avqustun 12-də Argentinada Dövlət İşçilərinin Assosiasiyası (ATE) və H.I.J.O.S. təşkilatı da Buenos-Ayres federal məhkəməsinə müraciət edərək Netanyahunun həbsini tələb edib.

Qeyd edək ki, Benyamin Netanyahunun 7–10 sentyabr tarixlərində Argentinaya rəsmi səfəri planlaşdırılır.