BAKI, AzerVoice, Səməd Əyyubov
ABŞ Prezidentinin Yaxın Şərq üzrə xüsusi nümayəndəsi Stiven Uitkoffun cümə günü Qəzza zolağına səfəri planlaşdırılır.
AzerVoice xəbər verir ki, bu barədə Ağ Evin mətbuat katibi Kerolayn Livitt məlumat verib.
O bildirib ki, Uitkoff və ABŞ-ın İsraildəki səfiri Mayk Hakabi bölgədəyə humanitar yardımın çatdırılması ilə bağlı məsələləri nəzərdən keçirmək üçün Qəzzaya gedəcəklər. Onlar mövcud yardım paylanma məntəqələrini yoxlayacaq, ərzaq çatdırılmasının artırılması üçün plan hazırlayacaq və yerli sakinlərlə görüşəcəklər.
Livitt qeyd edib ki, səfərdən dərhal sonra Uitkoff və Hakabi ABŞ Prezidenti Donald Trampı məlumatlandıracaq və bölgədə ərzaq və humanitar yardımın paylanması üzrə yekun planı təqdim edəcəklər.
“Bu plan prezident tərəfindən təsdiqləndikdən sonra sizə daha ətraflı məlumat verəcəyik” – deyə, Livitt bildirib.
Mənbələrin məlumatına görə, ABŞ Prezidenti Donald Tramp Qəzzadakı humanitar vəziyyətlə daha yaxından tanış olmaq və mülki əhaliyə göstərilən yardımı artırmaq üçün daha düzgün qərar vermək niyyətindədir.
Qeyd edək ki, iyulun 27-də HƏMAS lideri Xəlil əl-Həyyə, Qəzzanın blokadası davam etdiyi müddətcə İsraillə danışıqların mənasız olduğunu bəyan edib. Bundan əvvəl İsrailin Baş naziri Benyamin Netanyahu Qətərin paytaxtı Dohada keçirilən danışıqlarda iştirak edən İsrail nümayəndə heyətinin geri çağırılması barədə göstəriş verib. Bu qərar HƏMAS-ın atəşkəslə bağlı təklifə verdiyi cavabdan sonra qəbul edilib.
Stiven Uitkoff isə "X" sosial şəbəkəsində də yazıb ki, Vaşinqton da öz nümayəndələrini Dohadan geri çağırıb. O bildirib ki, HƏMAS-ın son cavabı Qəzzada atəşkəsə razı olmadığını açıq şəkildə ortaya qoyur.