BAKI, AzerVoice
"Avropa üçlüyü"nün (İngiltərə, Fransa və Almaniya) liderləri Qəzza zolağında mülki əhaliyə humanitar yardımın gecikmədən çatdırılmalı olduğunu bildirərək İsrailə çağırış ediblər.
AzerVoice xəbər verir ki, bu barədə üç ölkənin yaydığı birgə bəyanatda deyilir.
“Mülki əhaliyə əsas humanitar yardımın çatdırılmaması qəbuledilməzdir. İsrail hökumətini yardım axınına qoyulan məhdudiyyətləri dərhal aradan qaldırmağa, BMT və qeyri-hökumət təşkilatlarının öz vəzifələrini yerinə yetirməsi üçün Qəzzaya girişinə icazə verməyə çağırırıq” - deyə, bəyanatda qeyd olunub.
Ölkələr həmçinin, İordan çayının qərb sahili və Qəzza zolağındakı vəziyyətdən narahat olduqlarını bildiriblər.
“Qəzzada müharibə sona çatmalıdır. Bütün tərəfləri dərhal qarşıdurmalara son qoymağa çağırırıq” - deyə, bəyanatda bildirilib. Eyni zamanda, bütün əsirlərin azad olunması tələb edilib.
Bəyanatda həmçinin, HƏMAS-ın tərksilah olunmasının zəruriliyi vurğulanıb.
“HƏMAS-ın silahı yerə qoyması və Qəzzanın gələcəyində rol almaması zəruridir. ABŞ, Qətər və Misirin həyata keçirdiyi diplomatik səylərə dəstəyimizi bir daha ifadə edirik” - deyə, bəyanatda qeyd olunub.
Qeyd edək ki, İsrailin 2023-cü il oktyabrın 7-dən bəri davam edən hücumları, intensiv bombardmanlar və blokada nəticəsində Qəzzada ağır humanitar fəlakət yaşanır. Beynəlxalq ictimaiyyətin və BMT-nin atəşkəs çağırışlarına baxmayaraq, vəziyyət pisləşməkdədir.