BAKI, AzerVoice

Trampın bəyanatları ciddidir, təhlil üçün zamana ehtiyac var.

AzerVoice xəbər verir ki, Kreml sözçüsü Dmitri Peskov ABŞ Prezidenti Donald Trampın Rusiyaya qarşı səsləndirdiyi fikirləri “çox ciddi” adlandıraraq, bu bəyanatların birbaşa Prezident Vladimir Putinə yönəldiyini bildirib.

Peskov bu açıqlamaların təhlili üçün zaman tələb olunduğunu vurğulayıb.

Moskvada jurnalistlərin suallarını cavablandıran Peskov, Qərb ölkələrinin Ukraynaya əlavə silah göndərməsini kəskin tənqid edərək, bu addımın sülh deyil, müharibənin davamına dair siqnal kimi qiymətləndirildiyini bildirib.

“Vaşinqtonda deyilənləri analiz etmək üçün zamana ehtiyacımız var. Trampın bəyanatları həm ciddi, həm də şəxsən Prezidentimizə yönəlikdir. Putin lazım bildiyi təqdirdə münasib cavab verəcək”, – deyə Peskov qeyd edib.

ABŞ mediasında Trampın Ukrayna Prezidenti Volodimir Zelenski ilə Moskvaya və Sankt-Peterburqa mümkün hücum ssenarilərini müzakirə etdiyi barədə xəbərlərə isə Peskov “Belə ritorika bizim üçün yeni deyil” cavabını verib.

Qeyd edək ki, Tramp bir neçə gün öncə Ukrayna ilə 50 gün ərzində razılıq əldə olunmasa, Rusiyaya qarşı tariflərin 100 faiz artırılacağını və Ukraynaya əlavə “Patriot” hava hücumundan müdafiə sistemlərinin göndəriləcəyini açıqlayıb.

Peskov eyni zamanda bildirib ki, Rusiya Ukrayna ilə danışıqların üçüncü mərhələsinə başlamağa hazırdır və Kiyevdən vaxt təklifi gözləyir.