BAKI, AzerVoice
ABŞ Prezidenti Donald Tramp Vladimir Putinlə bağlı gözləntilərinin doğrulmadığını bildirib.
AzerVoice xəbər verir ki, o, Rusiya lideri ilə münasibətlərinin hələ tamamilə başa çatmadığını vurğulayıb.
Tramp, NATO Baş katibi Mark Rutte ilə Ağ Evdə keçirdiyi görüşdən sonra müsahibə zamanı Rusiya ilə bağlı dərin məyusluğunu dilə gətirib. Onun sözlərinə görə, Rusiya ilə dörd dəfə razılaşma əldə olunmağa çox yaxın olublar, lakin bu, baş verməyib.
“Yaxşı söhbətlərimiz olur. Elə bilirəm ki, razılaşma əldə olunmaq üzrədir. Amma sonra o (Putin) Kiyevdə bir binanı vurur” – deyə Tramp qeyd edib.
Donald Tramp daha əvvəl “köhnəlmiş” adlandırdığı NATO barədə fikirlərini də dəyişdiyini bildirib. Prezident Alyansın son illərdə daha fəal və müstəqil maliyyələşdiyini vurğulayıb.
O, NATO-nun kollektiv müdafiə prinsipini dəstəklədiyini bir daha təsdiqləyərək bildirib ki, bu mexanizm kiçik ölkələrin özlərini böyük güclər qarşısında müdafiə etməsinə imkan verir.