BAKI,AzerVoice

İranın müdafiə naziri, general-leytenant Əziz Nasirzadə bəyan edib ki, ötən ay İsrailin hücumuna qarşı İran Silahlı Qüvvələrinin qətiyyətli cavabı Təl-Əviv rejimini atəşkəs istəməyə vadar edib.

AzerVoice xəbər verir ki, Nasirzadə bildirib ki, İran Silahlı Qüvvələri bundan sonra da İsrailin və ya onun Qərbdəki himayədarlarının istənilən məsuliyyətsiz addımına peşmanedici cavab verməyə tam hazırdır.

O əlavə edib ki, İsrailin hücumu ABŞ və Avropa ilə diplomatik danışıqların davam etdiyi bir vaxtda baş verib və bu da Qərbin etibarsızlığını bir daha sübut edir.

Qeyd edək ki, İsrail iyunun 13-də İrana qarşı təxribat xarakterli hücum həyata keçirərək, yüksək rütbəli hərbi komandirləri və nüvə alimlərini qətlə yetirib, yaşayış məntəqələrinə hava zərbələri endirməklə mülki vətəndaşların ölümünə səbəb olub. Müharibənin doqquzuncu günündə ABŞ da konflikti dərinləşdirərək İranın üç əsas nüvə obyektini bombalayıb. İran buna cavab olaraq İsraildəki hədəfləri və Qətərdə yerləşən ABŞ hərbi bazasını vurub.