BAKI, AzerVoice

ABŞ hakimiyyəti Çindən, Türkiyədən və Birləşmiş Ərəb Əmirliklərindən olan 22 şirkəti İrana qarşı sanksiyalarla bağlı siyahıya daxil edib.

AzerVoice xəbər verir ki, bu barədə ABŞ Maliyyə Nazirliyinin Xarici Aktivlərə Nəzarət İdarəsinin (OFAC) rəsmi saytında məlumat verilib.

Bildirilib ki, bu qərar həmin şirkətlərin İran neftinin satışına kömək etməsi ilə əlaqədardır. Bu satışlar İran İslam İnqilabı Keşikçiləri Korpusunun (SEPAH) bölməsinin maraqlarına xidmət edir.

“Molla rejimi özünün kölgə bank sistemindən İran xalqının rifahı üçün deyil, nüvə və ballistik silah proqramları kimi regionu təhlükəyə sürükləyən fəaliyyətlərini maliyyələşdirmək üçün fəal şəkildə istifadə edir” – deyə, ABŞ maliyyə naziri Skott Bessentin sözlərinə istinad edilib.

Besent qeyd edib ki, departament İrana məxsus ABŞ və müttəfiqləri üçün təhlükə yaradan kölgə infrastrukturunu dağıtmağa yönəlmiş siyasətə diqqət yetirir.

Bundan əlavə, departament bəyan edib ki, sanksiya siyahısından bir sıra suriyalı hüquqi şəxslər çıxarılıb. Bu addımın Ağ Evin sanksiyaların ləğvi ilə bağlı vədləri ilə bağlı olub-olmadığı isə dəqiqləşdirilməyib.

Xatırladaq ki, 29 iyun tarixində ABŞ Prezidenti Donald Tramp bəyan etmişdi ki, müəyyən şərtlərlə İrana qarşı tətbiq olunmuş sanksiyalar ləğv oluna bilər. Onun sözlərinə görə, əgər İran “öz işini görərsə”, “sülhpərvər olarsa” və “zərər verməyəcəyini açıq şəkildə göstərərsə”, o zaman sanksiyalar ləğv edilə bilər. Tramp əlavə etmişdi ki, bu, böyük dəyişikliklərə yol aça bilər.

Bundan əvvəl isə İsrail Avropa ölkələrindən İrana qarşı bütün sanksiyaların dərhal bərpa olunmasını tələb etmişdi.