BAKI, AzerVoice

İsrailin Baş naziri Netanyahu, İsrail ordusunun Baş Qərargah rəisi Eyal Zamirdən Qəzzanın şimalının işğal edilməsini tələb etdi, lakin Zamirin Netanyahuya verdiyi etirazlı cavabı nazirlər kabinetində mübahisəyə səbəb oldu.

AzerVoice-un məlumatına görə, keçirilən iclasda Netanyahu və digər nazirlər, ordunun Qəzza zolağının şimalını tam şəkildə işğal edərək əhalini cənuba doğru köç etməsini istəyiblər.

"2 milyon insanı necə idarə edəcəyik?" - deyə, Eyal Zamir vurğulayıb. Bu zaman ifrat sağçı müdafiə naziri İtamar Ben Qvir və Maliyyə naziri Bezalel Smotriç onu əmrə tabe olmamaqda və Qəzzada çıxmaza səbəb olmaqda ittiham ediblər.

Zamir isə cavabında bildirib: "Siz daim Qəzza zolağında çıxmazdan danışırsınız. Halbuki, biz sizdən tələb olunan əməliyyatları tam şəkildə yerinə yetiririk."

Zamir, həmçinin, nazirləri sözlərinə diqqət yetirməyə çağırıb.

Zamir, Smotriçin Qəzzanın şimalının mühasirəyə alınaraq, HƏMAS-ın tez bir zamanda çökməsi fikrinə də cavab verib:

"Qəzzada hərbi bir hökumətmi istəyirsiniz?"

Netanyahu isə qışqıraraq, hərbi idarə istəmədiyini, ancaq HƏMAS-ı tamamilə məhv etmək niyyətində olduğunu bildirib. O, ordunun Qəzza zolağının bütün bölgələrini – hətta girovlar səbəbilə hələ hücum edilməmiş əraziləri də ələ keçirməsini alternativ çıxış yolu kimi göstərib. Ancaq bunun girovların həyatını təhlükəyə atacağını da etiraf edib.

Məlumata görə, Zamir Qəzza zolağında fələstinlilərə qarşı aclığın silah kimi istifadə olunduğunu qəbul edərək deyib: "Ac və hirsli insanları idarə etmək çətinləşir və bu, nəzarətin itirilməsinə səbəb ola bilər". Netanyahu isə sonda Zamirə əmr verib: "Təxliyə planını hazırla. Vaşinqtondan qayıdanda onu görmək istəyirəm".