BAKI, AzerVoice

Fələstin torpaqlarını işğal edən israillilər Əl-Əqsa məscidinə növbəti dəfə basqın ediblər.

AzerVoice xəbər verir ki, İsrail polisinin güclü müşayiəti ilə silahlı israilli qruplar bu gün səhər saatlarında işğal altındakı Şərqi Qüdsdə yerləşən Əl-Əqsa məscidinə basqın ediblər.

Fələstinin rəsmi WAFA agentliyinin məlumatına görə, israillilər qrup halında məscidin şərq hissəsində dini ayinlər icra ediblər.

Əraziyə yerləşdirilən İsrail polisi Qiblə məscidi və Qübbətüs-Səxra ətrafında sərt təhlükəsizlik tədbirləri görüb. Fələstinlilərin məscidə girişinə məhdudiyyətlər tətbiq olunub, çox sayda şəxsiyyət vəsiqəsi müsadirə edilib, namaz qılmaq istəyən vətəndaşlara qarşı təzyiqlər göstərilib.

Bu tip basqınlar status-kvonu pozmaq cəhdləri kimi qiymətləndirilir. İsrailin bəzi siyasətçiləri və radikal yəhudi qruplar tərəfindən mütəmadi olaraq təşkil olunan bu aksiyalar beynəlxalq səviyyədə narahatlıq doğurur.

Qeyd edək ki, Əl-Əqsa məscidinin qorunması və idarəsi hüququ 1994-cü il İordaniya-İsrail sazişinə və 2013-cü ildə kral II Abdullah ilə prezident Mahmud Abbas arasında imzalanan müqaviləyə əsasən İordaniyaya aiddir. Müqəddəs məkana dair status-kvoya görə, orada yalnız müsəlmanların ibadət etməsinə icazə verilir, digər dinlərin nümayəndələri isə yalnız ziyarət edə bilər.

Buna baxmayaraq, fanatik yəhudilər İsrail polisi tərəfindən qorunaraq məscidə daxil olur və tez-tez ibadət ayinləri həyata keçirirlər. Bu isə beynəlxalq hüquq və tarixi razılaşmaların pozulması kimi qiymətləndirilir.