BAKI, AzerVoice
Almaniya və İtaliyanın siyasi xadimləri, ABŞ-da saxlanılan və ümumi bazar dəyəri 245 milyard dollardan artıq olan qızıl ehtiyatlarının bir hissəsinin Avropaya qaytarılması üçün öz hökumətlərinə tövsiyə veriblər.
AzerVoice-un məlumatına görə, bu barədə “Financial Times” qəzeti məlumat yayıb.
Bu çağırışlar artan geosiyasi qeyri-sabitlik və ABŞ prezidenti Donald Trampın Federal Ehtiyat Sistemi (FES) ilə əsas faiz dərəcəsinin azaldılmasından imtina ilə bağlı münaqişəsi fonunda səsləndirilib. Avropa Parlamentinin keçmiş deputatı, Almaniyanın "Sara Vaqenknext İttifaqı – Ağıl və Ədalət Naminə" partiyasının üzvü Fabio De Masi bildirib ki, bu gərgin dövrdə qızıl ehtiyatlarının Avropaya qaytarılması üçün "əsaslı arqumentlər" mövcuddur.
Ümumdünya Qızıl Şurasının məlumatına görə, Almaniya və İtaliya ABŞ-dan sonra dünyada ən böyük qızıl ehtiyatlarına malik ölkələrdir (müvafiq olaraq 3,3 min ton və 2,4 min ton). Bu ehtiyatların əhəmiyyətli hissəsi – təxminən üçdə biri Nyu-Yorkdakı Federal Ehtiyat Bankında saxlanılır.
Almaniyanın mühafizəkar Xristian-Sosial İttifaqından olan sabiq Bundestaq deputatı Peter Qauvayler qəzetə verdiyi müsahibəsində bildirib ki, Almaniya Federal Bankı (Bundesbank) ölkənin qızıl ehtiyatlarının təhlükəsizliyindən güzəştə getməməlidir. Onun fikrincə, Almaniya hakimiyyəti son on ildə xaricdə qızıl saxlanmasının daha təhlükəsiz olub-olmadığı sualını yenidən gündəmə gətirməlidir. "Bu suala cavab isə aydındır" – deyə, siyasətçi vurğulayıb.
Avropa Vergiödəyiciləri Assosiasiyasının prezidenti Mixael Yeger isə qəzetə açıqlamasında bildirib: “Biz çox narahatıq ki, Tramp Federal Ehtiyat Sistemi müstəqilliyini sarsıdır.”
O, Almaniya və İtaliyanın qızıl ehtiyatlarının "vətənə qaytarılmasını" tövsiyə edib ki, Avropa ölkələrinin mərkəzi bankları bu aktivlər üzərində istənilən anda tam nəzarətə sahib ola bilsin. Yeger əlavə edib ki, assosiasiya artıq Almaniya və İtaliyanın maliyyə nazirliklərinə və mərkəzi banklarına ABŞ-ın Federal Ehtiyat Sistemindən asılılığın yenidən nəzərdən keçirilməsi ilə bağlı rəsmi müraciət göndərib.