BAKI, AzerVoice

Rusiya Xarici İşlər Nazirliyinin sözçüsü Mariya Zaxarova İsrailin İrana etdiyi hücumları qınayıb.

AzerVoice xəbər verir ki, bu barədə Zaxarova, Sankt-Peterburq Beynəlxalq İqtisadi Forumu çərçivəsində verdiyi açıqlamada bildirib.

"Yaxın Şərqdə vəziyyət son dərəcə təhlükəli həddə çatıb və bu gərginliyin əsas səbəbi İsrailin BMT Nizamnaməsini və beynəlxalq hüququ pozaraq İrana qarşı təcavüzkar addımlar atmasıdır. İsrailin bu cür davranışı regional və qlobal təhlükəsizlik üçün ciddi nəticələrə səbəb ola bilər. Bu hücumları saxta narahatlıqlarla əsaslandırmaq cəhdləri utancvericidir” - deyə, o vurğulayıb.

Zaxarova qeyd edib ki, İsrailin İranda yerləşən sülhməramlı nüvə obyektlərinə qarşı həyata keçirdiyi hücumlar qətiyyən qəbul edilə bilməz.

“Bu, beynəlxalq hüququn açıq pozuntusudur, dünya təhlükəsizliyi üçün qəbulolunmaz bir təhdiddir və bəşəriyyəti nüvə fəlakətinə sürükləyə bilər. Onun nəticələri İsrail daxil olmaqla hər yerdə hiss olunacaq” - deyə, Zaxarova bildirib.

Zaxarova çıxışı zamanı ABŞ-a da səslənərək, Vaşinqtonu İsrail–İran münaqişəsinə birbaşa müdaxilə etməməyə çağırıb. O bildirib ki, ABŞ-ın bu münaqişəyə qoşulması vəziyyəti daha da gərginləşdirə və nəzarətdən çıxara bilər.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.