BAKI, AzerVoice

ABŞ-da bəzi hərbi obyektlər dronlarla ediləcək hücumlar nəticəsində təhlükəyə məruz qala bilər.

AzerVoice xəbər verir ki, bu barədə The Washington Post qəzetinə amerikalı ekspertlər bildiriblər.

Vaşinqtonda yerləşən Yeni Amerika Təhlükəsizlik Mərkəzinin nüvə qarşısını alma və hərbi məqsədlərlə dronlardan istifadə mövzularında ixtisaslaşan elmi əməkdaşı Steysi Petticon bildirib ki, bu cür hücumlar ABŞ-ın hərbi bazalarına və ya ABŞ-ın xaricdəki obyektlərinə qarşı həyata keçirilə bilər. Onun sözlərinə görə, Pentaqon bu təhlükəyə qarşı çox ciddi tədbirlər göməlidir.

Petticon əlavə edib ki, ələlxüsus da Çin qüvvələri Tayvan mövzusunda baş verəcək münaqişə zamanı ABŞ aerodromlarına qarşı dronlardan istifadə edə bilər. O vurğulayıb ki, ABŞ Müdafiə Nazirliyi Asiya-Sakit okean regionunda belə bir ssenarinin baş verməsindən narahatdır.

“Bizim əleyhimizə də tam olaraq belə bir hücum həyata keçirilə bilər. ABŞ-ın təyyarələri bir sıra ölkələrdə yerləşir və bu cür hücumlara həssasdır” - deyə, Vaşinqtondakı Demokratiyaların Müdafiəsi Fondunun əməkdaşı Bredli Bouman rus aerodromlarına qarşı edilən hücumlara istinad edərək bildirib.

RAND Corporation tədqiqat mərkəzinin rəhbəri Ceyson Metini isə bildirib ki, strateji qurğular, raketlər, raket mərkəzləri və limanlarda nüvə sualtı qayıqları olan istənilən ölkə bu hücumları qiymətləndirir və konteynerlərdə gizlədilmiş dronları öz arsenallarına real təhlükə hesab edir.