BAKI, AzerVoice

Fanatik yəhudilər İsrail polisi himayəsində Əl-Əqsa məscidinə daxil olub.

AzerVoice xəbər verir ki, İsrail polisi himayəsində fanatik yəhudilər işğal altındakı Şərqi Qüdsdə yerləşən Əl-Əqsa məscidinə basqın ediblər.

Fələstinin rəsmi WAFA agentliyinin məlumatına görə, israilli məskunlaşan qruplar Məscidül-Əqsanın həyətinə daxil olaraq orada dini ayinlər icra edib və təxribat xarakterli davranışlar nümayiş etdiriblər. Basqın zamanı İsrail polisi müsəlman ibadətçilərə qarşı sərt tədbirlər görüb və məscidin girişlərində hərbi mövcudluğunu gücləndirib.

Son zamanlar, xüsusilə İsrailin Qəzzada başlatdığı hərbi əməliyyatların 20-ci ayına daxil olduğu dövrdə, Əl-Əqsaya edilən bu tip hücumların intensivləşdiyi müşahidə olunur.

İsrail hökumətində mühüm mövqelər tutan ifrat sağçı nazirlər açıq şəkildə bildirirlər ki, yəhudilərin Əl-Əqsada ibadət etməsi və bu ərazidə yəhudi məbədinin inşası hədəfləri sırasındadır. İsrailin maliyyə naziri Bezalel Smotrich, Məscidül-Əqsanın yerində yəhudi məbədi tikilməsi üçün büdcə ayırmağa hazır olduğunu deyib. Yəhudi Gücü partiyasının millət vəkili Zvi Sukkot isə İsrail bayrağı ilə məscid ətrafında çəkilmiş görüntülərini “Məscidül-Əqsa bizim əlimizdədir” sözləri ilə yayımlayıb.

Qeyd edək ki, İordaniya və İsrail arasında 1994-cü ildə imzalanmış Vadi Arabe Sazişinə əsasən, Qüdsdəki müqəddəs yerlərin dini statusuna nəzarət hüququ İordaniya Haşimilər Krallığına aiddir. Müvafiq razılaşmaya görə, Əl-Əqsa məscidi İordaniya Vəqflər və İslam İşləri Nazirliyinə bağlı Qüds İslam Vəqfi tərəfindən idarə olunur. Lakin 2003-cü ildən bəri yəhudilər bu müqəddəs məkanın ərazisinə İdarənin icazəsi olmadan, İsrailin birtərəfli qərarları əsasında daxil olurlar.