BAKI, AzerVoice

Fransa Prezidenti Emmanuel Makron, ABŞ Prezidenti Donald Trampın Rusiya və Ukrayna arasında 30 günlük “şərtsiz” atəşkəs elan olunması ilə bağlı verdiyi təklifi dəstəklədiyini bildirib.

AzerVoice xəbər verir ki, Makron dünən Trampla bir neçə dəfə telefonla danışdıqlarını qeyd edib: “Dünən gecə Prezident Trampla bir neçə dəfə əlaqə saxladım. Bu səhər britaniyalı və skandinaviyalı tərəfdaşlarımızın da etdiyi kimi, onun 30 günlük şərtsiz atəşkəslə bağlı verdiyi aydın çağırışı məmnuniyyətlə qarşılayıram.”

Makron, Fransanın münaqişənin dayandırılması üçün üzərinə düşən öhdəlikləri yerinə yetirməyə hazır olduğunu vurğulayıb: “Hamımız təxirə salmadan, aldatmadan və ya vaxtı uzatmadan bu istiqamətdə hərəkət etməliyik. Ukrayna artıq demək olar ki, iki aydır atəşkəsi qəbul etmiş vəziyyətdədir. İndi Rusiyanın da eyni addımı atmasını gözləyirəm. Əks təqdirdə, Avropa ölkələri və ABŞ-la sıx məsləhətləşmələr apararaq sərt reaksiya verməyə hazır olacağıq,” – deyə o qeyd edib.

Qeyd edək ki, ABŞ-ın sabiq prezidenti Donald Tramp Rusiya ilə Ukrayna arasında 30 günlük qeyd-şərtsiz atəşkəsin elan olunması üçün çağırış edib və atəşkəsə əməl olunmayacağı təqdirdə daha sərt sanksiyalar tətbiq olunacağı barədə xəbərdarlıq edib.

Tramp “Truth Social” platformasında etdiyi paylaşımda bildirib ki, Rusiya-Ukrayna münaqişəsi ilə bağlı danışıqlar davam edir və Vaşinqton qısa müddətli, lakin qeyd-şərtsiz bir atəşkəsin sülh prosesinə keçid üçün vacib addım olduğunu düşünür. Onun sözlərinə görə, hər iki tərəf bu təşəbbüsə hörmətlə yanaşmalıdır. “Əgər atəşkəs pozularsa, ABŞ və tərəfdaşları daha geniş sanksiyalar tətbiq edəcək”- deyə o bildirib.

Tramp həmçinin qeyd edib ki, bu addım davamlı sülh yaratmaq üçün əhəmiyyətli fürsət ola bilər və bütün prosesin “qısa müddətdə” həyata keçirilməsi mümkündür.