BAKI, AzerVoice
İsrail-Hindistan ittifaqının hədəfində Pakistan və Türkiyə var.
AzerVoice xəbər verir ki, İsrailin Hindistanı Pakistanla qarşıdurmaya təşviq etməsi, bölgədəki güc balansına təsir göstərir. Ekspertlərə görə bu strategiyanın məqsədi Pakistanı zəiflətmək və Türkiyəni potensial nüvə dəstəyindən məhrum etməkdir.
MÜSİAD-ın bölgə nümayəndəsi və Pakistan üzrə mütəxəssis Halit Uğurlunun sözlərinə görə, İsrail və Hindistanın birgə hərəkətləri, Türkiyə-Pakistan əlaqələrini hədəf alır. Uğurlu bildirib ki, İsrail gələcəkdə Türkiyə ilə qarşıdurmanı mümkün hesab edir və bu ehtimala qarşı önləyici tədbirlər görür: “Pakistanın neytrallaşdırılması, Türkiyənin regional dəstəksiz qalması Sionist planların əsas elementidir”, – deyə o vurğulayıb.
CPEC layihəsi çərçivəsində Çin, Pakistan və Türkiyə arasında formalaşan ticarət dəhlizinin də bu qarşıdurmanı dərinləşdirdiyini bildirən Uğurlu, Qvadar limanından Türkiyə üzərindən Avropaya uzanan xəttin İsrail və Hindistanı narahat etdiyini qeyd edib.
Qlobal və Strateji Araşdırmalar Mərkəzinin (GASAM) rəhbəri Cemal Demir də bölgədə yaşanan gərginliklərin təsadüfi olmadığını bildirib. Onun sözlərinə görə, Hindistan “Sindoor” adlandırılan hərbi əməliyyatla Azad Keşmiri hədəf alaraq, Pahalgam hadisəsini bəhanə edib. Demir, bu hücumların arxasında siyasi və enerji maraqları, habelə regional güc mübarizəsinin dayandığını vurğulayıb.
O əlavə edib ki, Hindistanın Pakistan üzərindəki hərbi üstünlüyü əhali və ordu sayına əsaslansa da, bu, keyfiyyət baxımından fərqli mənzərə yaradır. Demir, Hindistan daxilindəki 330 milyon müsəlmanın potensial təsirinin də nəzərə alınmalı olduğunu deyib. “Onlar camiləri və mülki obyektləri hədəf alaraq faktiki olaraq Qəzza modelini tətbiq edir. Pakistan isə yalnız mülki itkilər verir”, – deyə Demir bildirib.
Qeyd edək ki, son günlərdə Hindistanla Pakistan arasında nəzarət xətti boyunca artan hərbi toqquşmalar zamanı Pakistan ordusunun verdiyi məlumata görə, iki gün ərzində sərhədin müxtəlif hissələrində İsrail istehsalı olan 25 Hindistan PUA-sı vurulub. Sərhəd bölgəsində həm yüngül silah, həm də artilleriya ilə qarşılıqlı atışmalar davam edir.