BAKI, AzerVoice
ABŞ-ın ticarət balansında mart ayında 14 faiz artım qeydə alınıb və kəsir 140,5 milyard dollar təşkil edib.
AzerVoice xəbər verir ki, bu barədə ölkənin Ticarət Nazirliyi məlumat yayıb.
Məlumata görə, mart ayında ABŞ-ın mal və xidmət idxalı 419 milyard dollar olub ki, bu da fevral ayı ilə müqayisədə 4,4 faiz çoxdur. Eyni dövrdə mal və xidmət ixracı 0,2 faiz artaraq 278,5 milyard dollara çatıb. Analitiklər qeyd edirlər ki, ABŞ-ın mart ayındakı idxal həcmi rekord səviyyəyə çatıb və bu, ABŞ prezidenti Donald Tramp administrasiyasının gömrük rüsumları tətbiq etdiyi bir vaxtda baş verib.
ABŞ-ın mart ayında ümumi xarici ticarət dövriyyəsi 697,5 milyard dollar olub ki, bu da fevral ayı ilə müqayisədə 2,7 faiz çoxdur.
Ötən ilin yekunlarına əsasən, ABŞ-ın ticarət balansı kəsiri 918,4 milyard dollar təşkil edib ki, bu da illik müqayisədə 17 faiz artım deməkdir. Ötən il ABŞ-ın mal və xidmət ixracı 3,19 trilyon dollar, idxalı isə 4,11 trilyon dollar olub.