BAKI, AzerVoice

Meksika prezidenti Klaudia Şeynbaum, narkotik kartelləri ilə mübarizə çərçivəsində ABŞ prezidenti Donald Trampın ölkəyə ordu göndərmək təklifini qəbul etməyib.

AzerVoice xəbər verir ki, Şeynbaum bu barədə Meksikanın Texkoko şəhərində keçirilən tədbirdə çıxışı zamanı bildirib.

Meksika prezidenti bildirib ki, Tramp, ona Narkotik qaçaqmalçılığı ilə mübarizə çərçivəsində ABŞ ordusunun dəstəyinə dair təklif irəli sürüb. Şeynbaum isə bu təklifi sərt şəkildə rədd etdiyini qeyd edib.

“Torpaqlarımız toxunulmazdır, suverenlik satıla bilməz. Buna ehtiyac yoxdur. Biz əməkdaşlıq edə bilərik, birgə işləyə bilərik, lakin siz öz torpaqlarınızda, biz də öz torpaqlarımızda. Məlumat paylaşa bilərik, amma ABŞ ordusunun Meksika torpaqlarında yerləşməsini əsla qəbul etməyəcəyik” - deyə, Şeynbaum vurğulayıb.

Şeynbaum çıxışında həmçinin vurğulayıb ki, Tramp ilə əməkdaşlığa açıqdırlar, lakin Meksika azad, müstəqil və suveren ölkədir.

“Meksika xalqı bunu istəyir və mən də bir prezident olaraq hər zaman bunu müdafiə edirəm,” – deyə o qeyd edib.