BAKI, AzerVoice

Zənginlərin Britaniyadan köçü sürətlənir.

AzerVoice xəbər verir ki, Britaniyada sərvət sahiblərinə yönəlik vergi siyasətindəki dəyişikliklər milyarderlərin ölkəni tərk etməsinə səbəb olur.

Ən son nümunələrdən biri, Britaniyanın tanınmış daşınmaz əmlak investorları olan İan və Riçard Livinqstonun əsas yaşayış yerini Monakoya köçürməsi olub. Bloomberg-in məlumatına görə, onların ümumi sərvəti 8,5 milyard dollar dəyərində qiymətləndirilir.

Bu qərar, Britaniya hökumətinin oktyabrda açıqladığı yeni büdcə paketində kapital artımı və miras vergisi sahəsindəki güzəştlərin məhdudlaşdırılması ilə bağlı islahatlarla eyni zamana təsadüf edib.

Əvvəllər də varlı əcnəbilər — məsələn, misirli milyarder Nassef Sawiris və belçikalı Frederik de Mevius — oxşar səbəblərlə Böyük Britaniyanı tərk ediblər.

Vergi və hüquqi mühitin sərtləşməsi fonunda Monako zənginlər üçün cəlbedici seçim olaraq qalır. Ölkədə nə gəlir, nə də kapital artımı vergisi mövcuddur və miras vergisində də əhəmiyyətli azadolmalar tətbiq olunur.

Siyasi qeyri-sabitlik və Brexit nəticəsində zəifləyən iqtisadi mühit, London kimi dünya maliyyə mərkəzlərinin cazibəsini də azaldır. Məsələn, Goldman Sachs-ın üst səviyyəli rəhbəri Richard Nunde bu ilin əvvəlində Londondan Milana köçüb.

Qeyd edək ki, Britaniya son onilliklər ərzində zənginlərin əsas ünvanı olsa da, son dövrdə vergi dəyişiklikləri və siyasi qeyri-müəyyənlik bu mövqeyini təhlükə altına alır.