Bakı,AzerVoice

Suriyaya səfir göndərən İtaliya Əsəd rejimi ilə münasibətləri normallaşdıran ilk G7 ölkəsi olacaq.

AzerVoice xəbər verir ki, dünən İtaliyanın xarici işlər naziri Suriyaya diqqətləri cəlb etmək üçün səfir təyin etmək qərarına gəldiklərini bildirib.

Beləliklə, İtaliya müharibə başlayandan bəri Əsəd rejimi ilə münasibətləri normallaşdıran ilk G7 ölkəsi olacaq.

Qeyd edək ki, 2012-ci ildə İtaliya Dəməşqdəki səfirliyindən bütün əməkdaşlarını geri çağırıb və Suriyadakı diplomatik fəaliyyətini dayandırıb.

İtaliya Xarici İşlər Nazirliyinin Suriya üzrə xüsusi nümayəndəsi olan Stefano Ravaqnanı səfir təyin edib. Xarici işlər naziri Antonio Tajani Reuters agentliyinə bildirib ki, Ravaqnan tezliklə vəzifəsinin icrasına başlayacaq.

İtaliya və digər yeddi Aİ ölkəsi keçən həftə blokun xarici siyasət rəhbəri Josep Borrell-ə ​​məktub göndərərək, Avropa İttifaqının ölkədə daha fəal rol oynamasını xahiş edib.

Məktubu İtaliya ilə yanaşı, Avstriya, Cənubi Kipr, Çexiya, Yunanıstan, Xorvatiya, Sloveniya və Slovakiya da imzalayıb.

Tajani cümə günü verdiyi açıqlamada, "Borrell Avropa Xarici Fəaliyyət Xidmətinə nə edilə biləcəyi ilə bağlı araşdırma aparma tapşırığı verdi" demişdi və yeni səfirin təyin edilməsinin "Borrell-ə ​​göndərdikləri məktuba uyğun olaraq diqqəti Suriyaya çəkmək" məqsədi daşıdığını söylədi.

Qeyd edək ki, hazırda Dəməşqdə Rumıniya, Bolqarıstan, Yunanıstan, Cənubi Kipr, Çexiya və Macarıstan olmaqla Aİ-nin altı səfirliyi fəaliyyət göstərir