Bakı, VOA

Almaniya hökumətinin Avropa İttifaqında İran İslam İnqilabı Keşikçiləri Korpusuna (İİKK) qarşı terror sanksiyaları tətbiq edilməsi üçün rəsmi proses başlatdığı iddia edilir.

VOA xəbər verir ki, Süddeutsche Zeitung qəzetinin xəbərində Almaniya Xarici İşlər Nazirliyinin digər Avropa İttifaqına üzv ölkələrin dəstəyi ilə İİKK-nın sanksiya siyahısına salınması üçün müraciət etdiyi iddia edilib.

Xəbərdə xarici işlər naziri Annalena Baerbokun may ayında Aİ Xarici İşlər Nazirləri Toplantısında məsələni gündəmə gətirdiyi və Aİ-nin hüquq bölməsindən rəy istədiyi bildirilir. Aİ-nin hüquq ekspertlərinin isə “Almaniyanın müraciəti yüksək hüquqi tələblərə cavab verən bir təməl təşkil edir” dediyi iddia edilir.

Xəbərdə həmçinin, Avropa İttifaqının Xarici Əlaqələr üzrə Ali Nümayəndəsi Josep Borrell-in uzun müddətdir ki, hüquqi problemləri əsas gətirərək İrana qarşı terror sanksiyalarının tətbiqinə qarşı çıxdığı iddia edilib.

Xəbərdə Aİ-yə üzv ölkələrin mümkün sanksiya tədbirlərini yekdilliklə qəbul etmələri lazım olduğuna diqqət çəkilərək, Brüsseldə yekdilliyin əldə olunub-olunmayacağının dəqiq bilinmədiyi, ancaq məsələnin Aİ Şurasında müvafiq işçi qruplarında müzakirəyə yeni başladığı iddia edilib.

Qeyd edək ki, aprelin sonunda Avropa Parlamenti İran İnqilabı Keşikçiləri Korpusunu terrorçular siyahısına daxil etməyə çağırmışdı.