Bakı. AzerVoice:

Beynəlxalq yardım təşkilatı Oxfam Britaniyanın 7 oktyabr 2023-cü il tarixindən etibarən İsrailə silah satışı üçün 100-dən çox yeni ixrac lisenziyası verdiyini bildirib.

AzerVoice xəbər verir ki, bu barədə Oxfam təşkilatının Böyük Britaniyan üzrə baş direktoru Halima Begumun verdiyi yazılı açıqlamada bildirilib. O hökumətin İsrailə silah satmağa davam edərək münaqişənin qızışmasına kömək etdiyini qeyd edib.

Açıqlamada "Britaniya hökuməti yüzlərlə mövcud silah lisenziyasının heç birini sorğu-sual etmədən qüvvədə qalmasına icazə verib. Britaniya hökuməti İsrailə silah satmağa davam edərək bu dəhşətli münaqişənin qızışmasına kömək edir." - deyə qeyd edilib.

Hökumətin təcili olaraq öz kursunu dəyişməli olduğunu vurğulayan Begum, İsrailə silah və hərbi texnika satışı ilə bağlı bütün lisenziyaların "dərhal dayandırılmasını" tələb edib. O hökümətin verəcəyi bu qərarın Qəzzada atəşkəs və uzunmüddətli sülhə tərəfdar olması ilə bağlı nə qədər ciddi olduğunu göstərəcəyini söyləyib.

Böyük Britaniyanın Biznes və Ticarət Departamentinin açıqladığı məlumatlara görə, Böyük Britaniya 7 oktyabr 2023-cü ildən bəri İsrailə silah, hərbi texnika və digər məhsulların satışı üçün 100-dən çox ixrac lisenziyasını təsdiqləyib. Bu çərçivədə, keçən ay etibarilə, "çatma nöqtəsi İsrail olaraq təyin olunan" mövcud silah və hərbi texnika ixracat lisenziyalarının sayı 345-ə yüksəlib.

Onu da qeyd edək ki, ölkədə İsrailə silah və hərbi texnika satışı ilə bağlı 185 ixrac lisenziyası üçün də müraciət prosesi davam edir.