BAKI, AzerVoice

ABŞ prezidenti Donald Tramp dünən ukraynalı həmkarı Vladimir Zelenskini qəbul etməyə hazırlaşarkən Ukraynanın NATO-ya üzvlük perspektivinin artıq mümkün olmadığını bildirib.

AzerVoice xəbər verir ki , Tramp, həmçinin Ukraynadakı müharibəyə son qoymaq üçün Rusiya prezidenti Vladimir Putinlə tezliklə görüşmək istədiyini vurğulayıb. O, 2022-ci ilin fevralında Rusiyanın Ukraynaya hücumu ilə başlayan münaqişənin həlli istiqamətində irəliləyiş əldə etmək niyyətində olduğunu deyib.

Bununla belə, Tramp hər iki tərəfdən hansı güzəştlərə gedə biləcəyi barədə detalları açıqlamaqdan imtina edib. O, ABŞ administrasiyasının mövqeyini bir daha təsdiqləyərək bildirib ki, Ukraynanın NATO-ya qoşulmaq arzusu dayanıqlı deyil və Rusiyanın bu müharibəyə başlamasının əsas səbəbi məhz bu məsələ olub.

"NATO? Bunu unuda bilərsiniz. Mən düşünürəm ki, bütün bu münaqişə məhz bu səbəbdən başladı," – deyə Tramp bildirib.

Tramp əlavə edib ki, Zelenski cümə günü Ağ Evə səfər edəcək və burada ABŞ-la mineral ehtiyatların istismarı ilə bağlı iri miqyaslı saziş imzalayacaq. Bu açıqlamanı ABŞ prezidenti Nazirlər Kabinetinin ilk iclası öncəsi verib

Zelenski bazar günü Starmerlə Londonda görüşəcək

Digər tərəfdən, Zelenski dünən bildirib ki, ABŞ-la iqtisadi razılaşmanın çərçivəsi artıq hazırdır. Lakin o, Kiyevin Rusiyaya qarşı mübarizədə tələb etdiyi təhlükəsizlik zəmanətlərinin hələ də verilmədiyini vurğulayıb.

Ukrayna lideri Kiyevdə keçirdiyi mətbuat konfransında razılaşmanın tam təsdiqinin cümə günü Vaşinqtonda aparılacaq danışıqlardan asılı ola biləcəyini qeyd edib. O, həmçinin bildirib ki, əldə edilən çərçivə Ukrayna parlamenti tərəfindən təsdiqlənəcək hərtərəfli bir paketin ilkin mərhələsini təşkil edir.