Bakı, AzerVoice

ABŞ prezidenti Donald Tramp Ağ Evdə İsrailin baş naziri Binyamin Netanyahunu qəbul edib.

AzerVoice xəbər verir ki, görüşdən sonra keçirilən mətbuat konfransında Trampın Qəzza ilə bağlı səsləndirdiyi fikirlər geniş müzakirələrə səbəb olub.

Tramp bəyan edib ki, İordaniya və Misirin Qəzzanı nəzarətə götürməsini istəyir və bu ölkələrin fələstinliləri qəbul etməsi üçün torpaq ayıracağını iddia edib.

Bundan əlavə, Tramp Qəzzada yeni yaşayış məntəqələrinin tikilməsi planından danışıb. O, bölgəni tamamilə yenidən quracaqlarını və oraya dünyanın hər yerindən insanların köç etməsinin mümkün olacağını bildirib.

ABŞ prezidenti atəşkəsin davam edib-etməyəcəyi ilə bağlı dəqiq bir fikir bildirməkdən çəkinərək, bütün girovlar azad edilmədiyi təqdirdə zorakılığa əl atacaqlarını vurğulayıb.

Netanyahu isə Trampı İsrailin indiyə qədərki ən böyük dostu adlandırıb və onun dəstəyini yüksək qiymətləndirib.

Trampın bu açıqlamaları beynəlxalq arenada ciddi tənqidlərə səbəb olub. Bir çox ölkə və insan haqları təşkilatları Qəzzada əhalinin məcburi köçürülməsi planlarının beynəlxalq hüquqa zidd olduğunu bildiriblər.