Bakı, AzerVoice

ABŞ-ın yeni seçilmiş prezidenti Donald Tramp, Türkiyə Prezidenti Rəcəb Tayyib Ərdoğan haqqında müsbət fikirlər səsləndirib.

AzerVoice xəbər verir ki, Tramp bu barədə Floridadakı Mar-a-Laqo şəhərciyində keçirdiyi mətbuat konfransında xarici siyasət gündəmi barədə danışarkən bildirib.

Tramp bildirib ki, Ərdoğanla münasibətləri qarşılıqlı hörmətə əsaslanır.

Suriyadakı Amerika əsgərlərinin geri çəkilməsi ilə bağlı suala cavab verən Tramp, bu mövzunun Türkiyə ilə sıx bağlı olduğunu vurğulayıb.

Türkiyənin Suriyada əhəmiyyətli bir aktor olduğunu və bu bölgədə Rusiya və İranın zəiflədiyini qeyd edən Tramp, bu mövzuda Ərdoğanın bölgədəki proseslərə təsirini yüksək qiymətləndirib.

Tramp əvvəlki prezidentlik dövründə Suriyada İŞİD-i məğlub etdiyini və yeni müharibələrdən qaçındığını da xatırladıb.

O, Suriyadakı Amerika əsgərlərinin təhlükə ilə üzləşdiyi bir vəziyyətdə hansı addımı atmalı olduğunu bir generaldan soruşduğunu bildirərkən, “General mənə baxdı və dedi: ‘Yaxşı olmaz, cənab.’ Mən də əsgərləri oradan çıxartdım. Bunun nəticəsində 5 min insanın həyatını xilas etdim. Ancaq məni buna görə tənqid etdilər.” - deyə qeyd edib.

Tramp mətbuat konfransında müharibələrə girməmək və əsgərlərin həyatını qorumağın onun əsas prioritetlərindən biri olduğunu vurğulayıb.