BAKI,VOA,Yusif Şərifzadə

İsrail qüvvələri işğal altındakı İordan çayının qərb sahilində yerləşən Mixmas kəndinə keçirilən əməliyyat zamanı səkkiz fələstinlini saxlayıb. Hadisədən əvvəl kəndə israilli məskunlaşanların daxil olduğu bildirilir.

VOA xəbər verir ki, İsrail qüvvələri səhər saatlarında Mixmas kəndində bir neçə yaşayış evinə basqın edib və səkkiz fələstinlini saxlayıb. İsrail ordusu saxlanılan şəxslərin bir gün əvvəl kəndə qanunsuz daxil olan israilli məskunlaşanları təqib etmək və onlara hücum etməkdə şübhəli bilindiyini iddia edib.

İsrail polisi isə açıqlamasında bildirib ki, bir qrup israilli məskunlaşan yol hərəkəti qaydalarını pozduqdan sonra hüquq-mühafizə orqanlarından yayınaraq səhər tezdən Ramallah yaxınlığındakı Mixmas kəndinə daxil olub.

Məlumata görə, polis sonradan həmin şəxslərin şüşələri sındırılmış avtomobilini aşkar edib.

Bildirilir ki, ötən ilin oktyabr ayında ərazidə qanunsuz məskunlaşma məntəqəsi yaradıldıqdan sonra Mixmas kəndi dəfələrlə məskunlaşanların basqınlarına məruz qalıb.

Bundan əlavə, eyni adlı yaxın bədəvi yaşayış məntəqəsinin də məskunlaşanların silahlı hücumları, yandırma hadisələri və zorakılıqları səbəbindən sakinlər tərəfindən tərk edildiyi qeyd olunur.