İsrail mediası 1982-ci ildə Livanın Sultan Yaqub bölgəsində baş verən döyüş zamanı itkin düşən Yehuda Kats adlı əsgərin qalıqlarının 45 ildən çox müddət sonra tapıldığını bildirib.

“Kan 12” telekanalının məlumatına görə, İsrailə gətirilən insan qalıqları hazırda ekspertizadan keçirilir. İlkin ehtimala əsasən, qalıqlar Sultan Yaqub döyüşündə itkin düşən əsgər Yehuda Kats-a məxsusdur. Təhlükəsizlik qurumlarının onun ailəsinə kimlik müəyyənləşdirmə prosesi barədə məlumat verdiyi bildirilir.

Kats 1982-ci ilin iyununda İsrailin Livanın cənubuna müdaxiləsi zamanı Suriya və İsrail qüvvələri arasında baş verən Sultan Yaqub döyüşündə itkin düşən 6 əsgərdən biri olub. Döyüş nəticəsində 20 İsrail əsgəri öldürülüb, onlarla hərbçi yaralanıb.

Digər əsgərlərin qalıqları da tapılıb

Sultan Yaqub döyüşündə itkin düşən digər əsgərlərin qalıqları da müxtəlif illərdə İsrailə qaytarılıb.

2025-ci ilin mayında İsrailin baş naziri Benyamin Netanyahu Tsvi Feldmanın qalıqlarının xüsusi əməliyyat nəticəsində tapılaraq İsrailə gətirildiyini açıqlamışdı. İsrail ordusu və Mossad onun qalıqlarının Suriyanın dərinliklərində aşkar edildiyini bildirmişdi.

Bundan əvvəl isə 2019-cu ilin aprelində həmin döyüşdə itkin düşən Zaxari Baumelin cəsədi İsrailə qaytarılmışdı. İsrail tərəfi həmin əməliyyatda Mossad və Rusiya Müdafiə Nazirliyinin də iştirak etdiyini açıqlamışdı.

1982-ci ildə İsrail Livana genişmiqyaslı müdaxilə edərək “Qalileyə sülh” əməliyyatına başlayıb. Müdaxilə Livanda ağır humanitar və siyasi nəticələrə səbəb olmaqla yanaşı, regionun geosiyasi vəziyyətinə uzunmüddətli təsir göstərib.