BAKI,VOA,Yusif Şərifzadə

İsrail və Hizbullah arasında atəşkəsin yerli vaxtla saat 16:00-da qüvvəyə minməsi nəzərdə tutulsa da, bundan sonra da Livanın cənubunda hücumların davam etdiyi bildirilir.

VOA xəbər verir ki, atəşkəsin elan olunmasından sonra əsasən Nəbatiyyə və ətraf ərazilərdə azı 13 hava zərbəsi qeydə alınıb. Son günlər döyüşlərin əsas mərkəzlərindən biri məhz Nəbatiyyə olub.

Məlumata görə, İsrail qüvvələri bölgədə irəliləməyə çalışarkən, Hizbullah döyüşçülərinin Merkava tipli tankları hədəfə aldığını və pusqu nəticəsində dörd İsrail hərbçisini öldürdüyünü iddia edib. İsrail isə buna cavab olaraq genişmiqyaslı hava əməliyyatları həyata keçirdiyini və təxminən 150 Hizbullah hədəfini vurduğunu açıqlayıb.

Livanın Səhiyyə Nazirliyinin məlumatına əsasən, gecə yarısından etibarən baş verən hücumlar nəticəsində azı 47 nəfər həlak olub, 97 nəfər yaralanıb. Ölənlər arasında qadınların və uşaqların da olduğu bildirilir.

Qeyd olunur ki, bu rəqəmlərə atəşkəsin qüvvəyə minməsindən sonra baş verən hücumların qurbanları daxil deyil. Bu isə itkilərin sayının daha yüksək ola biləcəyi ehtimalını artırır.

Atəşkəsə ümid edərək evlərinə qayıtmağa başlayan sakinlər isə geniş dağıntılarla üzləşiblər. Yerli sakinlərin əksəriyyəti evlərinin ya tamamilə dağıldığını, ya da ciddi zərər gördüyünü bildiriblər.