BAKI,VOA, Fərid Mikayılov

ABŞ və İran arasında hərbi gərginliyin regional müharibə səviyyəsinə yüksəlməsi fonunda İordaniya Haşimi Krallığı ciddi raket hücumuna məruz qalıb.

VOA xəbər verir ki, İordaniya Silahlı Qüvvələrindən verilən rəsmi bəyanatda bildirilir ki, səhər saatlarında İran ərazisindən ölkənin strateji əhəmiyyətli Zerka şəhərinə doğru 20 ballistik raket atılıb.

Raketlərin hamısı İordaniya hava hücumundan müdafiə (HHM) sistemləri tərəfindən havada zərərsizləşdirilib. Vurulan raketlərin qalıqlarının şəhər ətrafına düşdüyü, hadisə nəticəsində hər hansı can itkisinin və ya ciddi maddi zərərin qeydə alınmadığı vurğulanıb.

İordaniya ordusu bəyanatda qətiyyətli mövqeyini nümayiş etdirərək, heç bir dövlətin ölkənin hava məkanını pozmasına və krallığı poliqona çevirməsinə icazə verilməyəcəyini diqqətə çatdırıb. Qeyd edilib ki, İordaniya Silahlı Qüvvələri regiondakı hərbi-siyasi prosesləri addım-addım izləyir və ölkənin suverenliyini, torpaq bütövlüyünü qorumaq üçün hər an tam döyüş hazırlığındadır.