BAKI,VOA,Yusif Şərifzadə

Livanın cənubunda İsrail və Hizbullah arasında qarşıdurmaların daha da intensivləşdiyi bildirilir.

VOA xəbər verir ki, Hizbullah Livanın cənubunda İsrail ordusuna qarşı həyata keçirdiyi əməliyyatlarla bağlı açıqlama yayıb.

Qrupun məlumatına görə, Zoutar bölgəsinin kənarında yerləşən ərazidə İsrail ordusuna məxsus "Merkava" tankları idarəolunan raketlərlə vurulub.

Açıqlamada həmçinin bildirilib ki, Dibin qəsəbəsi yaxınlığında İsrail qüvvələrinin irəliləyiş cəhdi zamanı əvvəlcədən yerləşdirilmiş partlayıcı qurğu işə salınıb və daha sonra tərəflər arasında silahlı toqquşma baş verib.

Hizbullah əməliyyatların nəticələri və mümkün itkilərlə bağlı əlavə məlumat verməyib.

Digər tərəfdən, yayılan məlumatlarda İsrail Müdafiə Qüvvələrinin Nəbatiyə şəhərinin kənarlarına yaxınlaşdığı qeyd olunur. Nəbatiyə Livanın cənubunda mühüm iqtisadi, sosial və mədəni mərkəzlərdən biri hesab edilir.

Şəhər uzun illərdir İsrail-Livan qarşıdurmalarının əsas istiqamətlərindən biri kimi diqqət mərkəzindədir və bölgədə baş verən hadisələr həm hərbi, həm də siyasi baxımdan xüsusi əhəmiyyət daşıyır.

Hərbi müşahidəçilər bildirirlər ki, son günlər İsrail və Hizbullah arasında raket zərbələri, pilotsuz uçuş aparatlarının istifadəsi və quru əməliyyatlarının artması bölgədə daha genişmiqyaslı qarşıdurma riskini yüksəldir.